ដោយ៖ រតនា
ភ្នំពេញ៖ សមាគមសហព័ន្ធភ្នាក់ងារសេវាកម្មពន្ធដារកម្ពុជា(CTAFA) នៅព្រឹកថ្ងៃទី២៣ ខែកុម្ភៈ ឆ្នាំ២០២៤ នៅភោជនីយដ្ឋានវ័នម៉រ ទួលគោក រាជធានីភ្នំពេញ បានរៀបចំពិធីប្រកាសបង្កើតនិងតែងតាំងសមាសភាពគណៈកម្មការប្រឹក្សាយោបល់និងផ្តល់ដំណោះស្រាយដែលហៅកាត់ថា គ.ប.ផ ជាយន្តការសម្រាប់ដឹកនាំសម្របសម្រួលនិងជួយជំរុញការងារសមាគម។
លោក អ៊ុំ សារ៉ាវុធ ប្រធានសមាគមសហព័ន្ធភ្នាក់ងារសេវាកម្មពន្ធដារកម្ពុជា(CTAFA) បានបញ្ជាក់នៅក្នុងពិធីប្រកាសបង្កើតនិងតែងតាំងសមាសភាពនោះថា គណៈកម្មការនេះមានតួនាទីសំខាន់ណាស់ ជាកម្លាំងចលករមួយដើម្បីជំរុញឲ្យការអនុវត្តការងារផ្តល់ប្រឹក្សាយោបល់និងផ្តល់ដំណោះស្រាយស្របទៅតាមកម្មវិធីយុទ្ធសាស្រ្តរបស់សមាគម។
លោក អ៊ុំ សារ៉ាវុធ បានបញ្ជាក់ទៀតថាគណៈកម្មការនេះមានកាតព្វកិច្ចស្នូលគឺផ្តល់ប្រឹក្សាយោបល់លើបញ្ហាប្រឈមដែលក្នុងនោះមានដូចជា៖ ទី១-កាន់កាប់បញ្ជីគណនេយ្យ, ទី២-រៀបចំរបាយការណ៍ប្រកាសពន្ធ វិវាទពន្ធដារនិងទី៣-ដាក់របាយការណ៍ហិរញ្ញវត្ថុឲ្យរងសវនកម្ម ជូនចំពោះសមាជិករបស់សមាគមនិងម្ចាស់អាជីវកម្ម។
លោកប្រធានសមាគមCTAFA បានឲ្យដឹងទៀតថា សមាសភាពរបស់ គ.ប.ផ ដែលត្រូវបានបង្កើតឡើងនាពេលនេះគឺរួមមានប្រធានមួយរូប, ទីប្រឹក្សាអម, អនុប្រធានមួយចំនួន និងសមាជិកជាច្រើនរូប។ គណៈកម្មការនេះនឹងត្រូវចាប់ផ្តើមអនុវត្តនូវតួនាទីនិងភារកិច្ចរបស់ខ្លួនប្រកបដោយប្រសិទ្ធភាពចាប់ពីពេលនេះតទៅ។
លោក ទេព សិដ្ឋាន់ណា ប្រធានគណៈកម្មការប្រឹក្សាយោបល់និងផ្តល់ដំណោះស្រាយ គ.ប.ផរបស់សមាគមCTAFAដែលទើបត្រូវបានតែងតាំង បានលើកឡើងថា គណៈកម្មការនេះគឺជាដួងព្រលឹង ដើម្បីជំរុញសកម្មភាពការងាររបស់សមាគមទាំងមូលឲ្យដើរឆ្ពោះទៅមុខប្រកបដោយប្រសិទ្ធភាពនិងនិរន្តរភាព។
លោកទេព សិដ្ឋាន់ណា បានរំលេចឲ្យឃើញថា គ.ប.ផ មានបេសកកម្មសំខាន់ខ្លាំងណាស់ក្នុងការផ្តល់ប្រឹក្សាយោបល់និងស្វែងរកដំណោះស្រាយទៅលើបញ្ហាប្រឈមមួយចំនួន។ ក្នុងនោះមានដូចជា៖ ការកាន់កាប់បញ្ជីគណនេយ្យ, ការរៀបចំរបាយការណ៍ប្រកាសពន្ធ និងវិវាទពន្ធដារ , ការដាក់របាយការណ៍ហិរញ្ញវត្ថុឲ្យរងសវនកម្ម ជូនចំពោះសមាជិករបស់សមាគមនិងម្ចាស់អាជីវកម្មនៅកម្ពុជា។
លោកអ៊ុំ សារ៉ាវុធ ក៏បានបញ្ជាក់ឲ្យដឹងផងដែរថា សមាគមសហព័ន្ធភ្នាក់ងារសេវាកម្មពន្ធដារកម្ពុជា CTAFA គឺជាសមាគមទើបតែមានលើកទី១នៅប្រទេសកម្ពុជា ដែលត្រូវបានបង្កើតឡើងតាមរយៈប្រកាសក្រសួងមហាផ្ទៃលេខៈ ៥៩៩៦ប្រក និងបានចុះបញ្ជី សារពើរពន្ធនៅអគ្គនាយកដ្ឋានពន្ធដារតាមរយៈលិខិតលេខៈ៣០០៧៣អពដ។
សមាគមនេះមានបេសកកម្ម ចូលរួមជាមួយរាជរដ្ឋាភិបាលក្នុងការផ្សព្វផ្សាយអប់រំនិងការបណ្តុះបណ្តាលច្បាប់សារពើពន្ធ។ ចូលរួមលើកកម្ពស់ការអនុវត្តកាតព្វកិច្ចសារពើពន្ធរបស់ ធុរកិច្ចជនឲ្យបានត្រឹមត្រូវនិងស្របច្បាប់។ ជាមួយនោះដែរគឺចូលរួមសហការជំរុញឲ្យមាន វប្បធម៌ចូលរួមបង់ពន្ធជូនរដ្ឋធ្វើឲ្យសេដ្ឋកិច្ចជាតិរីកចម្រើនបានឆាប់រហ័ស៕